O presidente brasileiro, Luiz da Silva, dixo este martes na Asemblea de Nacións Unidas que "non haberá solución para os terríbeis efectos dos cambios climáticos se a humanidade non é quen de cambiar os seus patróns de produción e de consumo".

O mandatario brasileiro expresou que "se o modelo de desenvolvemento non é repensado medran os riscos dunha catástrofe ambiental e humana sen precedentes".

Lula da Silva considerou necesario modificar a "lóxica aparentemente realista e sofisticada pero que en realidade é anacrónica, predatoria e insensata, da multiplicación do lucro e a riqueza a calquera prezo".

Neste sentido, Lula defendeu a produción de biocombustíbeis como unha "alternativa de enerxía limpa" e unha posibilidade para xerar fontes de "emprego, renda e favorecer a agricultura familiar".

O presidente brasileiro asegurou que o seu país "dará todas as garantías sociais e ambientais para a produción de biocombustíbeis", en tanto Brasil é o principal productor mundial dos combustíbeis derivados do millo, a cana de azucre e a soia.

Líderes mundiais como Hugo Chávez e Fidel Castro rexeitan a produción de biocombustíbeis porque sinalan que se trata dun modelo de desenvolvemento que elevará o prezo dos alimentos e agravará o problema da fame no mundo.•