Polo enxalzamento nacionalista, pola imposición do sanguento pensamento único nos medios de comunicación públicos e polo irracional culto a un ‘duce’ ao que din, e din ben, matador, a cousa ten un cheiriño algo fascista.

Os anteditos graffitis estaban na súa meirande parte sobre carteis que publicitan o que a Plataforma chama xenocidio animal. E chama ben, pois do exterminio dunha raza falamos. Asemade, na praza de touros líase: “se as touradas son arte, o canibalismo é gastronomía” –pura lóxica– e tamén “non á festa do fascismo”. De feito, polo enxalzamento nacionalista, pola imposición do sanguento pensamento único nos medios de comunicación públicos e polo irracional culto a un ‘duce’ ao que din, e tamén din ben, matador, a cousa ten un cheiriño algo fascista.

E fascista debe ser cando a protesta pacífica dos activistas foi respostada primeiro co acoso policial –ninguén máis pega carteis en Pontevedra?– e despois cunha violenta acción, literalmente incendiaria, o día 11 contra o Centro Social A Revira, que entre outras cousas serve de ágora aos antitaurinos do Lérez. Non é pois de estrañar que estes se sintan acosados, e sinalan polo miúdo –no referente ao asedio verbal– a un grupo de amantes dos matadores, a Peña 11. Un dos seus membros ten un blog (cesarabal.blogspot.com) moi clarificador. Tolerante el, deféndese das accións pacíficas dos antitaurinos con incongruencias como: “La Peña11 es una peña plural y libre que respeta todas las opiniones”. Non así todas as vidas, diría eu. Porén, do atentado non di ren. Supoño que o do día 11 e a Peña 11 é casual, que eu na cabalística créovos pouco.

Sexa como for, vai sendo hora de que os gobernos galegos –Concellos e Xunta– collan o touro polos cornos, pero para afastalo desa crueldade sen sentido prohibindo a tortura animal no país noso. Un 10 –non un 11– para os da Plataforma Antitaurina.•