Un amplo conxunto de accións exercidas sobre a vivenda e o patrimonio, nas cidades, nas vilas e no medio rural, e en xeral contra o territorio, déronse en chamar feísmo no noso país. É un termo aplicado máis aos aspectos formais do mostrado nunha serie de fotografías comentadas aparecidas esporadicamente nos medios de comunicación que a unha reflexión sobre a realidade captada nelas e a súa tipificación; considerouse porén necesario abordar xustamente isto último e para iso organizouse o I FORO DO FEÍSMO en novembro de 2004.

Sabendo que tomamos prestada unha palabra excesivamente ampla pero acompañada, iso si, dun amplo material de reflexión, que se recolle no libro Feísmo? Destruír un país, resultado do I Foro, convocamos o II Foro Internacional sobre o Feísmo, baixo o lema Construír un País: a rehumanización do territorio, para pensar desde Galiza sobre:

• A relación dramática home-territorio na presente etapa histórica: a destrución do lugar; os hábitats da pobreza; os tránsitos e migracións; os muros segregadores; a virtualidade.

• As agresións exercidas contra as cidades, as vilas e os núcleos poboacionais: a vivenda, a nosa segunda pel e articuladora de territorio, no seu epicentro.

• O modelo económico e socio-político no cal se producen.

• Alternativas e iniciativas de resistencia.

A. OBXECTIVOS
I. Reflexiónar sobre a relación dramática home-territorio na presente etapa; o «feísmo», síntoma de territorios en tensión: guerra, sobreexplotación, sobrepoboación, especulación; o lugar e o non-lugar; as migracións, os muros e o «outro»; a incidencia da virtualidade; iniciativas de resistencia.

II. Relatores galegos: avanzar na análise do fenómeno en Galiza e reflexionar sobre a súa pertenza ou non a unha situación «globalitaria»; alternativas posíbeis.

III. Ofertar Galiza desde a Consellería de Vivenda e Solo do Goberno Galego como sede para ‘pensar’ o fenómeno.

B. RELATORES DO FORO
Comité científico [biografías]
Antón Baamonde, Alexandre Alves Costa, Manuel Gallego Jorreto, Rubén Lois, Xerardo Pereiro, Teresa Táboas.

Comité asesor [biografías]
Xan Creus, Álvaro Domingues, Sérgio Fernández, Camilo Franco, Pablo Gallego, Begoña Muñoz, Chus Pato, Xosé Lois Martínez Suárez, Xosé Carlos Sierra, Xesús Vázquez.

Relatores convidados [biografías]
Antonio Bandeirinha, Paulo Castro Seixas, Hamma Mohamed Cori, Juan Luis Dalda, Francisco Diniz, Manuel García Docampo, Sandi Hilal, Plácido Lizancos, Meir Margalit, María Aparecida Pérez, Alessandro Petti, Ignacio Ramonet, Francesco Tonucci.

C. DATAS, LUGAR
4, 5 e 6 de maio de 2007
Ourense, Galiza. Centro Cultural Deputación Ourense.