ALBAROQUE DA LINGUA

Apúntate para o 16 de maio en Este enderezo de correo-e está protexido contra spam bots, necesitas ter o Javascript activado para podelo ver

Para os altos, para os baixos, para os de estatura... digamos, estándar.

Para os amigos do estándar, para os namorados do estándar, para os renegados do estándar.

Si, tamén para os reintegratas, lusistas e ludo-reintegracionistas, para os de máximos, para os de mínimos, para os que nin van nin veñen... Para os da concordia, tamén.

Para os neo-falantes, para os paleo-falantes, para os neo-pensantes, para os paleo-pensantes... para os galego-cavilantes en definitiva.

Para os que comen, para os que beben, para os que miran cómo beben e comen os demais.

Para os que devoran, para os que engulen, para os que tragan, para os que se enchen, para os que teñen catro estómagos, para os que soamente... remoen.

Para os esfameados, famentos e afamados.

Para os da costa, para os de interior, para os da montaña, para os da ribeira, para os das mil e unha tribos da Patria toda.

Para os do Dépor, para os do Celta, para os do Rácing, para os do Pontevedriña, para os do Lugo, para os do Alondras, para os do Bergantiños, para os do Spórting Zas...

Para os que se torraron nos incendios e se lixaron co chapapote, para o home-ra que todo bo hidroavión debe levar dentro (grazas polo teu martirio, amiguiño).

Para os do licor café, para os do licor de herbas, para os da queimada (o conxuro é opcional), para os do pau seco, para os da auja sin jas.

Para os gaiteiros da saia, para os talibáns da gaita, para pandeireteiras acérrimas, para os do toxo power, para cantores do himno.

Para os católicos, para os praticantes, para os ATS, para os celadores... perdón, retomo: para os protestantes, para os islamistas, para os budistas, para os panteístas, para os linotipistas e para os da Igrexa do Lacón con Grelos, que aquí collen todos.

Para os que nunca renunciarán ao patacón, o peso e a cadela polo euro.

Para os opositores, para as opositoras, e para os que se opoñen ás oposicións, para os que teiman en rematar unha tesina a tempo e tamén, porque non, para os que xa están a curar o xamón.

Para os homosexuais, para os heterosexuais, para os bisexuais, para os omnívoros da vida (mellor é comer agora que se pode).

Para os que confunden aos ufólogos cos seus debuxos no millo no día da romería, para os que saen buscar a Santa Compaña e só se encontran coa parella da ben-quérita, para os que saen ver o lobo e voltan para casa coa multa do Seprona.

En definitiva, para todos aqueles que teñen alma galega e senten latexar o idioma "de Profundis".