[Alai]

A asemblea final de conclusións do Cumio Social pola Integración dos Pobos –que contou coa visita inesperada do recentemente elixido presidente de Ecuador, Rafael Correa, e coa participación de deputados constituíntes de Bolivia– serviu para refrendar as propostas emanadas das 14 sesións temáticas discutidas no curso dos últimos tres días.

A asemblea asumiu un carácter de peche non-oficial do Cumio de Cochabamba, xa que, na práctica, o encontro remata mañá cun acto masivo convocado polo presidente boliviano Evo Morales.

Segundo a lista de delegados, o Cumio Social superou as expectativas. En total, 4.400 persoas participaron activamente dos paneis –cando eran esperadas só 3.000. En palabras de Blanca Chancoso, líder indíxena ecuatoriana que coordinou a asemblea, o Cumio Social pola Integración dos Pobos pode ser chamado como "Cumio do mundo, e non só da chamada América do Sur" –xa que a participación de delegados doutros continentes tamén foi alta.

As propostas que serán entregadas aos mandatarios de América do Sur trazan un proxecto popular para o continente tendo en conta 14 temas integrados. Militarización, auga, comercio, agricultura-terra-territorio, enerxía, revalorización da folla de coca, xustiza e impunidade, inmigración, infraestrutura, comunicación, financiamiento, medio ambiente, dereitos sociais, e pobos indíxenas.

Abaixo, só algunhas propostas, entre moitas máis, divididas por algúns dos temas.

Dereitos sociais

• construción dunha Carta Social Suramericana, que garanta o acceso universal á reforma agraria, á alfabetización, á auga, á diversidade sexual;
• unificación de campañas contra o fame, xa que a miseria do continente non é produto da escaseza, senón da mala distribución.
  

Enerxía

• fortalecer as empresas estatais de enerxía;
• nacionalizar as reservas enerxéticas dos países de América do Sur;
• empregar o diñeiro excedente que provén do comercio de recursos fósiles non-renovábeis en novas matrices de enerxía renovábel;
• acceso pleno de todos ao abastecemiento enerxético;
• non aceptar financiamentos do Banco Mundial, por exemplo, para non continuar hipotecando as nosas riquezas;
• a enerxía debe ser encarada como parte dun dereito humano ampliado.

Auga

• a auga como un dereito humano e un ben cultural dos pobos;
• excluír a auga de calquera acordo comercial;
• establecer un diálogo rexional entre gobernos e movementos sociais para a creación dunha Convención Suramericana da Auga;
• facer un mapa de todas as reservas hídricas do continente para garantir a súa protección;
• que se prohiba ás mineras e petrolíferas en zonas de recarga de auga.

Inmigración

• non tratar ao inmigrante como ilegal;
• establecer unha cédula única de identidade para os países de América do Sur;
• eliminación das prohibicións de residencias entre os países;
• que se creen programas de alfabetización e capacitación aos inmigrantes
• que se eliminen os impostos sobre as remesas de diñeiro para familiares.

Agricultura/terra/territorio

• considerar as sementes como bens públicos da humanidade;
• recoñecer o papel histórico das mulleres no proceso de mellora das sementes ao longo da historia.

Financiamiento

• realización dunha auditoría suramericana da débeda;
• creación dun Banco Solidario do Sur;
• creación dun fondo de reserva;
• creación dunha moeda única rexional.

Militarización

• retirar as tropas da MINUSTAH que están en Haití;
• que os gobernos suramericanos non envíen soldados para adestramento na Escola das Américas;
• que o goberno de Ecuador non renove o convenio con Estados Unidos sobre a Base de Manta.

Infraestrutura

• que a integración física do continente proposta pola Comunidade Suramericana de Nacións non sexa implementada no obxectivo de crear corredores de exportación, que pasarán a se converter en corredores de miseria se o obxectivo principal non é a integración dos pobos;
• repensar os modelos de transporte, dando preferencia á construción de camiños de ferro para o transporte de persoas, no lugar de estradas;
• reconstruír a rede ferroviaria e reactivar as empresas estatais;
• garantir a Bolivia unha saída para o mar como un dereito;
• creación dunha mariña mercante suramericana estatal;
• creación dun Banco Suramericano de fomento, que rache os paradigmas clásicos deste tipo de institución.

Revalorización da folla de coca

• contra a penalización internacional da folla de coca, que é descaradamente imposta xa que documentos científicos que comproban as súas características positivas son solemnemente ignorados;
• que as Nacións Unidas (ONU) presenten a totalidade dos estudos sobre a folla de coca;
• que a folla de coca sexa suprimida da lista de estupefacientes, xa que ela representa a vida e forma parte da cultura dos pobos indíxenas;
• que a sagrada folla de coca sexa considerada patrimonio cultural dos pobos orixinarios xa que é alimento, vida e soberanía.

* Marcelo Netto Rodrigues é xornalista de Brasil de Fato/Minga Informativa