[Galicia Hoxe]

Nas ribeiras dos ríos emprazáronse os primeiros asentamentos humanos. Xunto ás augas frías e nítidas de ríos de montaña ou xunto ás augas acougadas e de cor marrón de ríos de selva creceron numerosas comunidades sabéndose próximas á auga potable e a variados alimentos. Nas selvas amazónicas os ríos proporcionan auga para unha agricultura diversificada que garante todo o que necesitan as familias: árbores froiteiras e madeirables, cacao, millo, frijoles, iuca, etc. A pesca asegúralles as proteínas á súa dieta con decenas de variedades de peixes con nomes que recordan a orixe das cousas: pirarucú, tucunaré, jaraquí ou tambaquí. Tamén nas marxes dos ríos se poden colleitar moitas plantas medicinais para previr infeccións de útero ou para aliviar a tose.

Os cursos fluviais foron territorios de biodiversidade garantes da soberanía alimentaria dos pobos. Pero están ameazados. Cando se fere a un río mátanse moitos seres humanos. As industrias extractivas e mineiras e as fumigacións dos monocultivos contaminan os ríos, que son as augas que beberán as familias. A expansión dos cultivos de exportación, como a soia e os novos agrocombustibles, leva consigo a talla da masa forestal ata as mesmas marxes dos ríos, eliminando a protección natural que ofrecían fronte ás crecidas das augas. Pobos enteiros lévanllos as augas sen esa protección.

Todas estas consecuencias afectan miles de familias indíxenas, a poboacións rurais marxinadas, fillas e irmás do río, e veranse multiplicadas coa próxima construción dunha hidrovía de 4.200 km sobre o río Madeira, afluente do Amazonas, con catro represas hidroeléctricas con excluídas para a navegación, dúas situadas en Brasil, a terceira en augas binacionais e unha cuarta en Bolivia.

As represas provocarán a inundación das terras de cultivo provocando a expulsión das comunidades campesiñas e indíxenas ribeiregas, a perda de fauna acuática, así como o aumento de enfermidades infecciosas. Estes resultados deberán sumarse á casa do debe nas contas finais do Banco de Santander. O banco financia (sendo parte da Iniciativa para a Integración de infraestrutura de América do Sur), as obras da primeira represa, a de Santo Antón en Brasil, previstas para este mes de agosto. Na última xunta de accionistas do banco, o presidente Sr. Botín regaloulles a todos os accionistas un chuvasqueiro. Para protexerse do chuvieiro.