"DECIDME CÓMO ES UN ÁRBOL". Memoria de la cárcel y de la vida

Sobre Marcos Ana (Fernando Macarro Castillo)

Naceu en Alconada, unha pequena aldea de Salamanca, en 1920, no seo dunha familia pobre de xornaleiros do campo. A súa vida estivo marcada por unha paixón constante en defensa dos oprimidos e desherdados e unha entrega absoluta ao seu ideal comunista. Dende a súa primeira xuventude, loitou do lado republicano, durante a guerra civil española. Ao rematar esta, en 1939, foi detido, xunto a millares de demócratas, e condenado a morte. Permaneceu encarcerado durante 23 anos ininterrompidos: toda a súa xuventude e a metade da súa vida. Nesa Universidade dolorosa escribiu os poemas que traspasaron os cárceres e levaron o seu nome a través do mundo, contribuíndo a desencadear unha campaña de solidariedade no seu favor. Foi un dos primeiros presos políticos españois defendidos por Amnistía Internacional.

Ao ser liberado, en 1961, Marcos Ana percorreu Europa e grande parte de América, sendo recibido en Parlamentos, Universidades e centenares de concentracións populares, promovendo e organizando a solidariedade cos presos políticos e as súas familias e denunciando as prácticas fascistas que, por entón, se realizaban en España.

Fundou e dirixiu en París, ata o final da Ditadura franquista, o Centro de Información e Solidariedade con España (CISE), que presidiu Picasso. Apoiado por personalidades da cultura e a política europeas, este Centro organizou a defensa dos dereitos humanos, a acción pola Amnistía xeral e a axuda moral e material a todas as vítimas da represión política.

Sobre o libro

O libro narra os 23 anos pasados en prisión, a súa loita dende a poesía desenvolvida entre muros. A liberdade recuperada, o desenvolvemento dunha enorme actividade solidaria dende o seu posterior exilio en Francia, onde crea o CISE, un faro da cultura española. A súa peregrinación polo planeta convertido nun símbolo da solidariedade internacional e a loita antifranquista, buscando rescatar a convivencia democrática.

Tivemos que esperar longo tempo para gozar das memorias dun grande poeta nacido da longa noite española. O mellor saído das lapas da guerra, a feroz prisión e o posterior exilio. Considerado unha testemuña de excepción por Alberti ou Neruda.

Temos a oportunidade de recuperar un anaco da historia recente de España. Traer ata os nosos días sentir daqueles que viviron a guerra civil e con poderosa voz fálannos de luz e esperanza común.